مااقبح الرجال لاصار له قلبٍ حسود
لو نفسه حبت الطيب قلبه صدها
مايعـَرْف إلاّ لغات الدراهم والنقود
يتهلل وجهه الودر يوم يعدها
للجمايل والمعاريف نكارٍ جحود
بالوفاء والجود ماعمر كفه مدها
لابدا فعل الجميلة ولا أوفى بالوعود
ومن رداه : الطيّبة مايحاول ردها
وإن فعل له مرةٍ خير وثّق بالشهود
وكل ماجا للجميلة مجالٍ عدها
وكل ماطال العمر يطلع الطيّب سنود
والردي يفقد من الناس صادق ودها
وسمعة الرجّال لامن فقدها ماتعود
والحقائق تنكشف للبشر من ضدها
ولاتزيّن لحيةٍ وجه راعيها الحقود
لو بدهن العود والورد قام يكدها
والوبل ماهو بكثرالعواصف والرعود
وكم ديمة جابت الوادي ولاسدها
والتسامح بعض الأحيان نوع من الصمود
والتشنج بالأوادم يبيّح سَدّها
عبد العزيز شداد الحيسوني الحربي
ليست هناك تعليقات:
إرسال تعليق