مرحبا بالزائر الكريم

أحب الصالحين ولست منهم ، لعلي أن أنال بهم شفـــاعة
وأكره من تجارته المعاصي ، ولو كنا سواء في البضاعة

أبحث في قوقل

24‏/10‏/2018

تعلم من الطبيعة


تعلّم من الشمس ضبط المواعيد
‎وتعلّم من الأرض صبرك على الناس
وتعلّم البهجة وخذها من العيد
‎ومن الزهور وطيبها صدق الإحساس
ومساحة الصدر اقتطعها من البيد
‎ومن الحديد وقسوته قوّة الباس
وتعلّم من الليل سـتر الأجـاويد
‎لا تصير ناشر  للمعايب و بلّاس
و خذ الحذر يابن الأوادم من الصيد
‎ومن السحابة والسماء رِفْعَة الراس
ومن النحل ذوقه وطِيب المواريد
‎و تَرْكِه وخِيم المنبت و وَحْل الأدناس
ومن المطر طيب العطاء والمقاصيد
‎يحي الغصون اللي من الوقت يبّاس
و خذ الثبات من الجبل شامخ الحيد
‎لاتصير أمام العاصفة تقل قرطاس
وعن السراب وخدعته خلك ابعيد
‎مايعطي اللي يتبعه غير الإفلاس
وخلك كما العود الذي طيبه يزيد
‎ريحه يطيّب لا انحرق كل مجلاس
وإذا عجزت تقاوم الضعف وتفيد
‎تجنب الهفوات ومبالش الناس
   عبد العزيز شداد الحيسوني الحربي



30‏/09‏/2018

قصيدة : الوعود


يابنات الفكر بالرأس أقْعِدِن
دَلَّة الفِكر استـوى لي صَبّـها

سولفِن لعيوني اللي ما ارقِدَن
من زمن حلو الكَـرىٰ ماطَبـّها

وأعلـِنن وَقْف التفاهم والهُدَن
وأشعلـِنّ الحرب باللي شَـبّـها

المحبـّة مـَاتَـأَتَّـىٰ مـن لـَــدُن
واحد قلوب البشر يلعب بها

جئت متصلّب وتبغاني لـَدِن
لا ؛ أنَـانِـيَـتـْـك هــذي كِــبـها

أنت ما أنت بعائش بجنّة عَدَن
أنت فـي دنيا عمـيـقٍ جُــبّـها

يوم كنت أقول لك: أقرَب وأدِن
تقـْطَع حبال الوَصـل وتجـبّـها

والوعود اللي غداً جئت وغَدَن
ولا اتركَن لك فرصةٍ تكذب بها

واهْبطَن انفاس صدرك واصْعَدَن
غَلْطِـتَك هـذي تحَمّـل غِـبّــهَـا

واسمع ردودٍ بـها سِم الـبـَدَن
كَـم سَنَـة والنـار فِـيّ تشـبـها

أكرهِك كرهي لأمانات المدن
رغم كبر جهـودها ما احبـها

من عيونه للمثالب يرصـدِن
مامَلَك حب القـلوب و لُبـّـها

والشفـاه اللي بحـبـك ماشِـدَن
شوف وش قَدّمت قبل تسبـها

والظنون اللي عن الدرب يحدَن
لا متابـِعـْها ولا راكِب بــَـهـا

والكفوف اللي بخيرٍ ماندن
لامـُـقَـبّـلْـها ولا نـاشِب بـَهـا

عبد العزيز شداد الحربي

27‏/05‏/2018

حوار مع النفس


         ----- حوار مع النفس -----

نفسي تزايد من عناها هبالها
‎أخطيت يوم إني سعيت بدلالهـا
كنت أحسب إن النفس تشبع وترتوي
‎وأسرفت في تحقيـق ماجـاء ببالهـا
ويوم اكتشفت إن الخطر حام حولنا
‎بأسبابها وأسباب ترك الهوى لهـا
حاولت أروّضهـا وأعدّل طباعهـا
‎وعَصَت عليّ وبان منهـا خبالهـا
وقامت تطالبني وتصرخ وتنتخي
‎وتلوذ برقبتي وترمي بشالهـا
وتقول: تكفى! شف غدت كيف حالتي
‎من شافها لو هو عدوٍ رثى لهـا
قلت: أقنعي يانفـس ماعاد عندنا
‎لِك حاجة ٍ تقضى قريبٍ منالهـا
أتعبت فـي كل أمنياتِك جوارحي
‎حتى اشتكى جنوب الأعضاء وشمالها
قالت: وش اللي غيرك، قلت: خالقي!
‎ثم اسكتت ساعة! ورَدّت سؤالهـا
وقالت: ترى ربك بعفوه ورحمته
‎يغفـر ذنوبٍ ماقدرت احتمالهـا
قلت: إيه قلتي حق تبيـن باطل
‎رحمة عظيم الشأن طالب ظلالهـا
قالت: غريب الفكرة اللي تشكّلت
‎في داخلك حتى افتتنـت بجمالهـا
وخَلتْك ترفضنـي وتهمل مطالبي
‎وتقلـِب عليّ الطاولـة باحتفالهـا
قدّامَك الأيام والحرب قادمة
‎وتَعْرِف من اللي ينتصر من خلالهـا
قلـت: الله القادر بعزه وقوّته
‎ينصر جيوش الحق و يعز جالهـا
ولازالت النفس يتعاظم عنادها
‎وترفع عليّ من الدعاوي هزالهـا
ولازلت أحاورها عسى يوم تقتنـع
‎وأزريت أسكّتها و أوقّف جدالهـا
   عبد العزيز شداد الحيسوني الحربي

16‏/05‏/2018

تجاهَل

تجاهَل

لاتنقل اللي من ورانا يقولون
وش مصلحتنا يوم نَعـْرِف غثاهم

ماهمنا اللي بالمعائب يهرجون
ولانشدنا من هو اللي وراهم

اللي رضوا بالدون يبقون بالدون
واللي مايفهم كيف معه نتفاهم

مادام بالعالي مايبغون يرقون
لايسحبونك تنزل لمستواهم

تجاهل اللي بالمجالس يلجون
واطلب من الله لايصيبك بلاهم

مايردع المجنون عادة وقانون
ومتكبرين القوم ضائع دواهم

موسى نبي ولا اقتنع فيه فرعون
ولافاد قارون الذهب والدراهم

عبد العزيز شداد الحيسوني