ياعل بيتٍ به اتْرٓد الشفاعة
ويْرٓد به جاه الرجال المشاكيل
في موقفٍ به للكريم استطاعه
سهلٍ على قروم الرجال الحلاحيل
يضيق فيه الكون عقب اتساعه
والصبح للغربان والبوم بالليل
وتشوف بالسيسان مثل الصداعه
وتلقى حواليه السوافي مصابيل
وصرير بابه عند كل اندفاعه
يعزف مع أنسام الهبايب مواويل
بيتٍ يقفّل في وجيه الجماعة
ماطيّبه عودٍ ولاطيّبه هيل
الطيب ماينبت بحقل اللكاعة
ولاللنشاما في رياضه مداهيل
ومن لايكون الطيب خالص طِباعِه
ماهو بطايب لأحرجوه الرياجيل
راع الحسد والكره ساس القطاعة
من ابسط الاشياء يسوي تهاويل
آخِذ على سوء النوايا قناعة
وبدروب ربعه ناصبٍ له محابيل
وكلٍ على طبعه يكون انطباعه
الطيب له بوجيه الأجواد تهليل
والنذل في وجهه تشوف البشاعه
ومن منطقه تعرف جميع التفاصيل
مااخفاه عنك سنين في ظرف ساعه
تظهر علومه كلها بارد الحيل
وصبرٍ على عوجا الرفاقة شجاعه
الرأس ماينزل إلى مستوى الذيل
والسمعة أعلى وسام وأغلى بضاعه
ومن باعها كثرت عليه المداخيل
واللي يبي من ذل ربعه طماعة
عز الله إنه ما يحصل محاصيل
غير الزرا والعار يلبس اقناعه
وسواد وجهه بالليال المقابيل
عبد العزيز شداد الحيسوني الحربي
ليست هناك تعليقات:
إرسال تعليق