يارب أغثنا

يارب أغثنا.!

يارب أغثنا بالمزون الممطرة
وتعم في خيراتها كل ابْلدي

توحّدت بالجو بعد البعثرة
وخبط المطر يبدأ قبل لاترعدي

والماء بُعَيْد الظهر قامت تنثره
وبلٍ وصوته خالطه وقع ابْردي

يالين مابه وادي أحدٍ يعبره
وروافده تقول ديبان اتـْعَدي

وكن المرايا بالفياض مكسّرة
إذا تخلل خيط شمسٍ عسجدي

أما الجبال من البَرَد متميزرة
لبست حرام أبيض مهاب المشهدي

ريحة ثراها من نقاها معطّرَة
مع النسيم العابر المترددي

والخير في كل النواحي تنشره
والأرض ترفل بالخضار و ترتدي

والكل باح بما يحس ويشعره
الناس تضحك والطيور تغردي

والحمد لله أشكره وأستغفره
نرفع بشكوانا إليه ونسجدي

عبد العزيز شداد الحيسوني الحربي

أُمّي !

يارب من لأمّي!؟

يارب مَن لـ (أمّي) إذا مسها الضيق
‎وخلت زغاريد الفرح والسعادة
همٍ تشيله بالثقل يشبه طويق
‎همٍ سطى فيها وحقق مراده
رحيمةٍ شالت هموم المخاليق
‎رفيقة الإيثار بنت الإراده
عظيمةٍ تعشق علو الشواهيق
‎وحب المعالي طبع فيها وعاده
كريمةٍ مثل المزون المغاديق
‎المال في يدها سريعٍ نفاده
بنت الرجال أهل الوجيه المطاليق
‎أهل العلوم الغانمة والرياده
يارب أنا ما اطيق ما اطيق ما اطيق
‎ما اطيق أشوف أمي تعيش بنكاده
هَدّ المرض منها العظم والمعاليق
‎والليل ماذاقت حلاوة رقاده
للدمع بخدودي دروب وطواريق
‎ومما تحس أمي هجرت الوسادة
حرام لو تشرف على القلب وتويق
‎اتشوف قلبي كيف حوّل رمادٓه
يامغرقتني في فضايلك تغريق
‎لك كل مااملك يالحنون وزياده
بس اضحكي يكفي عذابٍ وتحريق
‎مالي على تكدير جوك جلاده
يارب ترزقنا هداية وتوفيق
‎وبرٍ بها بر نتذوّق براده
يارب طوّقها برحمتك تطويق
‎واجمع لها الصحة وحسن العباده
عبد العزيز شداد الحيسوني الحربي